Երգեցողությունը սրտին հետ կապ ունի, որ ուղղակի հոգիին կերթա

Հունիսի 4-ին՝ ժամը 15:00, «Սեբաստիա» համերգասրահում տեղի կունենա Կոմիտասի գրի առած, բայց չձայնագրված երգերի շնորհանդեսը:

Ծրագրում՝

1. Մանի ասեմ
   Տաթև Ստեփանյան (կոնտր ալտ), Արթուր Ալեք Քոսբեկյան (ջութակ) և Մերի Առաքելյան (դաշնամուր)
2. Եղնիկ
   Տաթև Ստեփանյան և Մերի Առաքելյան
3. Կոտ ու կես
   Տաթև Ստեփանյան և Մերի Առաքելյան
4. Կոմիտաս, Փոփուրի
   Հասմիկ Մաթևոսյան և Լիլիթ Առաքելյան (դաշնամուր)
5. Թագվորագովք
   Տաթև Ստեփանյան
6. Հե՜յ, գյուլ եմ
   Տաթև Ստեփանյան, Արթուր Ալեք Քոսբեկյան և Մերի Առաքելյան
7. Կոմիտաս, Փոփուրի
   Արթուր Ալեք Քոսբեկյան (ջութակ) և Արփի Ռուստամյան (ալտ)
8. Սարեն կուգաս
   Տաթև Ստեփանյան, Արթուր Ալեք Քոսբեկյան և Մերի Առաքելյան
9. Համբարձման անուշ գիշեր է
   Տաթև Ստեփանյան և Մերի Առաքելյան

Նախագծի համակարգող՝ Մարինե Մկրտչյան

Նախագծի պատասխանատուներ՝ Մարինե Մկրտչյան և Տաթև Ստեփանյան

Տեսագրման պատասխանատու՝ Սեբաստացի TV

«Մխիթար Սեբաստացի» կրթահամալիրում «Ուսումնական օրացույց»-ով  նախատեսված «Կոմիտասյան օրեր»-ին կրթահամալիրի երաժիշտ դասավանդողներս ներկայացրեցինք  «Կոմիտաս» նախագիծը, որտեղ առաջարկեցինք սովորել և ձայնագրել Կոմիտասի կողմից գրառած, բայց չձայնագրված երգերից, որոնք կդառնան ունկնդրման նյութեր և կհամալրեն կրթահամալիրի «Ձայնադարան» բաժնի «Կոմիտաս» փաթեթը:
Հայկական ժողովրդական երգերի կատարման համար, բացի վոկալ տվյալներից, հարկավոր է ունենալ ազգային գիտակցություն, լինել ազգայինի կրողը, ճիշտ զգալ և ճիշտ գույներով ներկայացնել: Ժամանակակից հայը բավական հեռացել է իր ազգային երգարվեստը ստեղծող հայի տեսակից: Այդ է պատճառը, որ հիմնականում կատարողները չեն զգում և այլ դաշտում են կատարում, այլ երանգներով են ներկայացնում բնության հետ հարմոնիկ ապրող հայի ստեղծած երգերը (նաև՝ պարերը): Կարծում եմ՝ այն կատարումները, որոնք չեն բխում ստեղծագործության ասելիքից, չպետք է մատուցվեն սովորողներին, քանի որ այդպես էլ նրանց համար չի բացահայտվում ամենակարևորը: Այստեղից էլ առաջացել էր պահանջ՝ կատարել նոր ձայնագրություններ:
Նախ, հարկավոր էր գտնել այն երգերը, որոնք կհամապատասխանեին կատարողի երաժշտական զգացողությանը, ձայնային տվյալներին: Երգի ուսուցումը մասնագետ երաժշտի համար խնդիր չի, յուրացվում է շատ արագ: Այլ է, երբ սկսում է կատարել նոր ստեղծագործություն և փորձում իր համար պարզել ակունքը՝ ինչպե՞ս և ի՞նչ հոգևոր արժեքների հիման վրա է այն ստեղծվել, որպեսզի կարողանա այն զգալ բոլոր բջիջներով, թափանցել այն հասարակ հողի մշակի, մանկանն օրորող մոր, Համբարձման գիշերը սրտի թրթիռով իր բախտագուշակությանը սպասող աղջկա և մյուսների հոգու խորքերը և բացահայտել այն առանցքայինը, որի վրա կառուցվել են այդ երգերը, որոնք ստեղծելու մեծ պահանջ է եղել մարդկանց մոտ:
Այս ամենը նկատի ունենալով, երգերից մի քանիսի կատարումը վստահեցի Տաթև Ստեփանյանին,  որոնք ընտրել եմ Կոմիտասի հատորներից: Դրանք բավական սիրով ու հաջողությամբ կատարվեցին և ձայնագրվեցին ձայնագրման ստուդիայում՝ Կարեն Խաչատրյանի կողմից:
Սիրով հրավիրում ենք մեր համերգ-շնորհանդեսին:

Մարինե Մկրտչյան